🔴 పశ్చిమ గోదావరి : భీమవరం : ది డెస్క్ :
విఘ్నేశ్వరుడికి వెండి కానుక
కేజీకి పైగా వెండి పాలవెల్లి సమర్పణ
రూ.2.50 లక్షల విలువైన వెండి కానుక
భీమవరం పట్టణంలోని ప్రముఖ ఇలవేల్పు, ఆరాధ్యదైవం శ్రీ మావుళ్లమ్మ అమ్మవారి ఉపాలయంలో కొలువైన శ్రీ విఘ్నేశ్వర స్వామివారికి భక్తిశ్రద్ధలతో వెండి పాలవెల్లిని విరాళంగా సమర్పించారు. భీమవరానికి చెందిన గిన్నీ రామకుమారి సుమారు రూ.2.50 లక్షల విలువైన 1,037 గ్రాముల (కేజీ 37 గ్రాములు) వెండి పాలవెల్లిని ఆలయానికి అందజేశారు.
ఈ సందర్భంగా ఆలయ ప్రధాన అర్చకులు బ్రహ్మశ్రీ మద్దిరాల మల్లికార్జున శర్మ ఆధ్వర్యంలో ప్రత్యేక పూజలు, ఆశీర్వచనం నిర్వహించారు. భక్తురాలు సమర్పించిన వెండి పాలవెల్లికి పూజా కార్యక్రమాలు నిర్వహించి స్వామివారి ఆశీస్సులు అందజేశారు. ఆలయ అసిస్టెంట్ కమిషనర్ బుద్ధ మహాలక్ష్మి నగేష్, ఆలయ చైర్మన్ బొండాడ నాగభూషణంతో పాటు ధర్మకర్తలు రామాయణం శ్రీనివాస్, ఉదిశి మీనాక్షి, మల్లువలస లక్ష్మి నిర్మల, గొంతెన రమణ, యండా సత్యవతి, ఇందుకూరి సుబ్రహ్మణ్యం రాజు, పాపోలు ఏడుకొండలు తదితరులు పాల్గొన్నారు.
అనంతరం దాత గిన్నీ రామకుమారిని ఆలయ కమిటీ తరఫున సత్కరించి, శేషవస్త్రం, ప్రసాదం, జ్ఞాపిక అందజేశారు. ఆలయ అభివృద్ధి, ఆధ్యాత్మిక కార్యక్రమాలకు భక్తులు స్వచ్ఛందంగా అందిస్తున్న విరాళాలు అభినందనీయమని ఆలయ నిర్వాహకులు పేర్కొన్నారు. విఘ్నేశ్వర స్వామివారికి వెండి పాలవెల్లి సమర్పించడం ద్వారా భక్తురాలు తన భక్తిని చాటుకున్నారని తెలిపారు.
